التوازيط
كانت ليام زينة ف قبايل التوازيطالجلسة نزاهة بين لجواد
تحت الجنان وف جنبو الواد
مزينها الصينية والبراد
الضحك والتزافيط
وخا لعيش بسيط
لمرا تخبز ع لوكيد
نهار لعيد تشوي ع لمجمر
وع لحبال تنشر لكديد
تضوي بالشمع تشعلو بالوقيد
تسهر ع الراديو والكاسيط
كانت الفاكية خزو واللحم ف الشريط
الخير موجود الفلاح يبيع الخضرة بالتقسيط
يتقضى ب 50درهم والصرف يشيط
ايام الحشمة مشات مع الجلابة والنقاب
الاخلاق والصواب
لبنت ما تطل من شرجم
ما توقف ف الباب
تصون شرف اباها الا غاب
اليوم لحمام يرعى مع غراب
ولات السقاية ف السوق
ما بقاش الكرابلمريض علقوه حجاب
ف لعروبية ولمدينة جابنا طبسيل
علقناه ف سطح الدار
مابقا لحيا لا وقار
لعروبية بغات تركب ع لحمار
جرات ع القابلة حتى هي اختارت
تولد ف السبيطار
سمحت ف الكروسة وشدات الكار
لبست القميجة والدجين
سبغات الشعر وكحلت العينين
البرابول حل ليهاالعينين
ذاب السور لحصين
لي ورثاتو من الوالدين
مسلسلات المكسيك
علموها قلة الدين
الحاصول لعروبية ولمدينية
ف لمسخ ولاوا متساويين
غرقنا ف الذنوب حتى لودنين
الله يعفو علينا كاملين
تبعنا فعال النصارى
وتخلينا ع لمسلمين
زجال الغرب
حسن البرارحي
سيدي يحي الغرب
0 commentaires:
Enregistrer un commentaire