موتى بلا كفن (بقلم زجال الغرب: حسن البرارحي)

موتى بلا كفن 

(بقلم زجال الغرب: حسن البرارحي)

لي بغا يعرف لموتى بلا كفن

يزور الشراردة بني احسن

يقطع الشك من الظن

لمسؤولين غمضوا عينيهم

ف لودنين داروا لقطن

الشوارع عامرة زبل

عليها الدبان يزنزن

لكلاب دايعة ف الشوارع

كيف لغنم شي ينبح شي يهرنن

سبيطار لولادة متعفن

ستفوا لوالدات كيف الشرن

رجعونا حمير خاصنا غير التبن

دمرونا بالقهر ولغبن

الناس ناشطة ف لمدن

حنا الهم ولحزن

لمسؤول ف عذابنا يتفنن

خدموا لعيالات ف لوزينات

الرجال ف لقهاوي مبركن

كميان جوانات وشد الركن

خداوا الزبدة من الشكوى

حنا بقا لنا اللبن

من الذل تمنيت نموت احسن

يستاهل لغرباوي راسو قاصح

كيف لمسن

ما يعرف ينافق كيف الناس

ولا يتمسكن حتى يتمكن

ف لغدر ولخدع ما يعرف يبين السن

خيرنا يكفينا لمسؤولين شحال

كلمناهم ما سمعوا لنا

كلهم تامروا علينا

سرقوا لميزانية همشوا لمدينا

نتمناوا يزورنا سيدنا

حقنا يرجع لنا

يفرحوا السكان وتنشط لمدينا

يا سيدنا هذا طلب من السكان

زورنا ورجع الاعتبار لنا

بقلم زجال الغرب: حسن البرارحي