لبحلاسة
زجال الغرب / حسن البرارحي
جرب لعسل عجبو يلحسواحد ديما شبعان
امو طيابة ف لعرس
كاين لي توسدها ونعس
لي سترهم لابس مفركس
لي فضحهم قطعوا فيه النفس
هدوه بالحبس
مايشوف لا هوا لا شمس
لي صفق وضرب الرش
يركد ويتخلص
لي قال لا خلاوه ع الدص
هرسوه جبروه بالكبص
قليل النفس يبحلس ويخمس
باش يدبر ع لفلس
عندو زايد ناقص
يشطح ويضرب النواقس
كلها وهمو
واحد وصلو عمو
لمسكين خيطوا ليه فمو
كلاوا القطبان خلاوا الدخان يشمو
كاين لي مايرضى بالظلم سب وشتم
كاين لي حشم
ومول لمعقول رشاوه طوى لكتاب ورمى لقلم
حاسب راسو نزق معلم
باع ضميرو استسلم
واحد من الحكرة انتحر شرب السم
عاش ف حياتو متالم
عيا يصبر ويخمم
لاعيشة زينة لاسعد مسكم
اللهم ملقاه مع قبر مظلم
ولا ظلم خوه لمسلم
واحد بنا الفيلات والفارم
واحد عقبوه ع طرف لحم
واحد براكة ناعس ع لحصير
الغني لابسين لحمام ينزل وطير
واحد ساكن مع لحمير
الحاصول الله يتاونا للخير
0 commentaires:
Enregistrer un commentaire